Drejtori i Medresesë “Isa Beu” në Shkup, Dr. Islam Islami, ka njoftuar përmes një postimi se Qeveria e Maqedonisë së Veriut ka miratuar Ligjin për shkollat e mesme fetare, duke i hapur rrugë njohjes formale të diplomave të këtij institucioni arsimor.
“Sot është një ditë historike për medresenë tonë. Me këtë ligj, diplomat tona do të njihen dhe pranohen nga të gjitha institucionet e arsimit të lartë brenda dhe jashtë vendit,” shkruan Islami, duke e cilësuar këtë si një fitore të madhe pas një beteje që ka zgjatur për dekada.
Ai falënderoi të gjithë kontribuuesit në këtë proces, duke përmendur veçanërisht kryeministrin për mirëkuptimin, zëvendëskryeministrin e parë për mbështetjen, ministren e Arsimit dhe Shkencës, zëvendësministrin për angazhimin e palodhshëm, si dhe të gjithë ata që ndihmuan në këtë arritje.
Në fund, drejtori Islam Islami shprehu shpresën që ligji të kalojë sa më parë edhe në Kuvend, duke inkurajuar deputetët që ta mbështesin këtë hap të rëndësishëm për arsimin fetar në vend.
Drejtori i Medresesë “Isa Beu”: Ditë historike, qeveria miratoi ligjin që njeh formalisht diplomën tonë
