Shefi i PR-it në Aleancën për Shqiptarët, Arben Zeqiri, ka reaguar pas dorëheqjes së Omer Ajdinit nga partia, duke e cilësuar këtë veprim si “të përsëritur” dhe “të motivuar nga interesa personale”.
Në një deklaratë publike, Zeqiri theksoi se kjo është hera e tretë që Ajdini jep dorëheqje, gjithmonë pasi nuk ka arritur të marrë poste apo kandidatura.
“Kur hyjmë në Qeveri në vitin 2023 ai heshti derisa emroheshin funksionarët. Kur ngeli pa post doli me akuza dhe sulmoi Ziadin Selën. Edhe në zgjedhjet parlamentare 2024 nuk mbajti anë, madje deklaroi në TV21 se ka lënë politikën. Por në dhjetor u afrua përsëri me krahun tjetër, duke shpresuar kandidaturën në Likovë. Kur nuk e mori, dha dorëheqje për të tretën herë,” tha Zeqiri.
Ai shtoi se Ajdini po përdor dorëheqjet si mjet presioni për të siguruar poste politike:
“Tani shpreson pas zgjedhjeve të marrë ndonjë post me Fetahun. Nëse nuk merr asnjë post, ju garantoj që për herë të katërt do të japë dorëheqje nga ASH,” tha Zeqiri.
Në fund, Zeqiri e cilësoi Ajdinin si “aventurier pa sukses në politikë”, duke shtuar se liderët duhet të mësojnë se me njerëz të këtillë nuk ndërtohet as politikë e as kauzë.