Lëvizjet ushtarake të SHBA-së në orët e fundit ngritën pritshmëri për një ndërhyrje të afërt kundër Iranit, por operacioni u pezullua në momentet e fundit, raportoi gazeta gjermane Bild, duke cituar burime pranë administratës amerikane.
Sipas raportimeve, personeli amerikan ishte larguar nga disa baza në rajon, hapësira ajrore mbi Iran u mbyll dhe avionë cisternë u ngritën nga baza amerikane në Katar. New York Times raportoi se bombardues me rreze të gjatë veprimi ishin vënë në gatishmëri, por një zyrtar amerikan konfirmoi më vonë se procesi ishte “ngrirë”.
Presidenti Donald Trump deklaroi se Irani kishte ndaluar ekzekutimet e protestuesve, duke shtuar se Uashingtoni kishte marrë “informacion shumë të mirë” mbi situatën. Teherani, nga ana e tij, mohoi planet për ekzekutime të afërta.
Analistët mbeten të ndarë nëse pezullimi është taktik apo një ndryshim real kursi. Analisti izraelit Amir Bohbot tha se Trump ndërhyri personalisht për të ndaluar sulmin, duke kërkuar garanci se çdo veprim ushtarak do t’i jepte një goditje vendimtare regjimit iranian.