Kryetari i Komunës së Tetovës, Bilall Kasami, ka shprehur publikisht mbështetjen e tij për kandidaten për deputete të Partisë Demokratike në Shqipëri, Jorida Tabaku. Gjatë një vizite në Tiranë, Kasami e cilësoi Tabakun si një politikane që “e bën politikën me zemër”, pranë njerëzve dhe jo e mbyllur në zyrë.
“Ka politikanë që flasin për qytetarët dhe ka të tillë që ecin përkrah tyre. Jorida është një prej këtyre,” u shpreh Kasami, duke theksuar rëndësinë e kontaktit të drejtpërdrejtë me qytetarët. Ai shtoi se fletushkat e shpërndara gjatë ditës kishin vlerë, por më e rëndësishme ishte ndjesia që vjen nga bisedat reale me njerëzit në rrugë e lagje.
Me këtë mesazh, Kasami përçoi jo vetëm një përkrahje politike, por edhe një filozofi të qasjes ndaj politikës – atë të shërbimit të ndershëm dhe të ndjeshëm ndaj qytetarëve.