Kryetari i Komunës së Tetovës Bilall Kasami prezantoi sot projektet për tre pishina të reja në Tetovë. Dy prej tyre do të ndërtohen në kuadër të shkollave fillore “Naim Frashëri”, ku veçmë po punohet, dhe “Kirili dhe Metodi”, ndërsa psihina e tretë e mbyllur do të jetë në kuadër të shkollës së mesme Gjimnazi “Kirill Pejçinoviq”.
“Kështu Tetova bëhet qytet modern, krijojmë kushte bashkëkohore për nxënësit, edhe për mësim, edhe për rekreacion. E çojmë Tetovën drejt një standardi krejt të ri të infrastrukturës publike”, tha Kasami.
Ai përkujtoi se gjatë mandatit të tij u bë pishina e parë në Tetovë, në kuadër të Qendrës Sportive.
“Përderisa mbyllnim një nga një nevojat elementare infrastrukturore, u përkujdesëm që Tetovën ta bëjmë edhe me pishinë, e cila sot po ju shërben nxënësve tetovarë edhe me kurse noti falas”, tha Kasami.