Grupi i këshilltarëve të BDI-së, në komunën e Tetovës, përmes një postimi në profilin e kësaj dege kanë ngritur shqetësimin se Ndërmarrja Publike Komunale Tetova – Tetovë për një vit i e tre muaj ka gjeneruar humbje prej 550 mijë euro, ku vitin 2024 e kanë mbyllur me humbje prej 6milion denarë ose (100 mijë euro) ndërsa vetëm për tre muaj në vitin 2025 kanë gjeneruar humbje prej 28milion denarë ose (445 mijë euro) shkruan Top24
NPK TETOVA ME 550.000 EURO HUMBJE PËR NJË VIT E TRE MUAJ!
Raportet financiare të Ndërmarrjes Publike Komunale Tetova tregojnë zhytje të madhe në borxhe.
Vitin 2024 e kanë mbyllur me 6 milionë denarë (100.000 euro) humbje, ndërsa vetëm në tremujorin e parë te vitit 2025 kanë gjeneruar humbje prej 28 milionë denarë (455.000 euro).
Kjo situatë është ende më e çuditshme kur shihet se kjo ndërmarrje për këtë periudhë ka marrë ndihmë financiare nga Komuna e Tetovës në vlerë prej 41 milionë denarë (670.000 euro) si dhe ka pasur të hyra nga ndërmarrjet Sharri dhe Saubermacher në vlerë prej 45 milionë denarë (730.000 euro).
Vetëm nga Komuna, NP Sharri dhe Saubermacher kanë marrë 86 milionë denarë (1.400.000 euro), pa i llogaritur edhe të hyrat tjera.
Po si u bë që punëtorët e ndërmarrjes nuk marrin rroga tanimë 3 muaj!?
Gjithë këtë humbje nesër në seancë të këshillit komunal do kërkojnë që ta mbulojë Komuna e Tetovës!
Është e qartë se këtu kemi të bëjmë me keqpërdorim të parave të qytetarëve mbi kurrizin e punëtorëve të cilët e bëjnë punën e tyre dhe nuk paguhen.
Për këtë situatë kemi paralajmëruar çdoherë kur nga buxheti i Komunës së Tetovës ndaheshin mjete për NPK-në dhe në çdo rast kryetari i komunës Bilall Kasami ka qenë dalëzotës dhe ka garantuar se ato mjete nuk do keqpërdoren, mirëpo raportet financiare tregojnë atë që ne e kemi paralajmëruar, KEQPËRDORIM KLASIK!
