Protestë serioze, dorëheqje komike në Nikushtak
Në Nikushtak të Likovës, drama e mbeturinave po merr gjithnjë e më shumë ngjyrime groteske. Qeveria vetëm disa ditë më parë bëri bujë duke pastruar deponinë famëkeqe që për vite me radhë ishte helm për banorët, e sidomos kur shpërthente në flakë. Por, ironikisht, vetëm pak ditë më vonë, ndërmarrja komunale e higjienës e mbushi sërish me mbeturina, me arsyetimin se nuk ka ende një lokacion tjetër të miratuar për hedhjen e tyre.
Kjo “lojë ping-pongu” me shëndetin e qytetarëve nuk mbeti pa reagim. Banorët e Nikushtakut dolën në rrugë, bllokuan hyrjen e kamionëve dhe bënë të qartë se nuk do të pranojnë kthimin e deponisë në oborrin e tyre. Ata e lidhën situatën edhe me fushatën parazgjedhore, duke akuzuar politikanët se shfrytëzojnë çështjen për poena personale.
Por kulmi i farsës ndodhi kur këshilltari komunal Bastri Rexhepi, në një moment që do ta kishin zili edhe skenaristët e humorit, vendosi të shpallë dorëheqjen e tij “të parevokueshme” live në Facebook, pikërisht nga deponia. Gesti u shoqërua me duartrokitje, por edhe të qeshura të hapura nga të pranishmit – jo vetëm për teatrin e momentit, por edhe sepse zgjedhjet lokale janë vetëm pak javë larg, dhe dorëheqja i tingëlloi më shumë si skeç elektoral se si akt serioz politik.
Si për të kompletuar komedinë, Rexhepi pas pak orësh fshiu videot dhe u tërhoq nga dorëheqja, duke thënë se kishte vepruar nën “emocione të ngutshme”. Në fund, i vetmi që “u pastrua” vërtet pas gjithë kësaj sage, ishte Facebook-u i tij.
Ndërkohë, banorët e Nikushtakut mbeten të vendosur: deponinë nuk e duan më aty, sado që politikanët ta përdorin si skenë për teatrin e tyre parazgjedhor