Nga Aleanca për Shqiptarët, pjesë e Frontit Europian reaguan ndaj deklaratave të deputetit Rijad Shaqiri nga VLEN, i cili në Daily Click në TV21 pranoi që është vonuar Ligji për Përfaqësim të Drejtë dhe Adekuat. Nga ASH-Sela thonë se shqiptarët janë të përjashtuar nga punësimet e reja.
Në lidhje me: “Ligji është prolonguar” – Shaqiri për ligjin për përfaqësim të drejtë dhe adekuat: Më mirë të vonohet sesa të bëhet shkel e shko
“Prolongimi i ligjit për përfaqësim të drejtë dhe adekuat në një kohë kur Gjykata Kushtetuese tanimë ka shfuqizuar edhe përkatësinë etnike dhe Balancuesin, është kulmi i realizimit të planit të Mickoskit dhe Dimitrievskit për deshqiptarizimin e institucioneve shtetërore. Vleni pasi gënjeu shqiptarët sa për të mbuluar shfuqizimin e përkatësisë etnike, tani u dorëzua edhe nga kjo gënjeshtër dhe pranoi se nuk do të sillet Ligji për përfaqësim të drejtë dhe adekuat. Kjo nënkupton se gjatë konkurseve të reja për punësime në institucionet shtetërore dhe publike nuk do të ketë asnjë mekanizëm për punësimin e shqiptarëve dhe bashkësive të tjera joshumicë. Duke patur parasyshë deklaratat e deritanishme të drejtuesve të Qeverisë, fatkeqësisht që tani dihet epilogu i konkurseve, deshqiptarizimi i shtetit dhe stërmbushja e administratës vetëm me anëtarë të VMRO-së, ZNAM-it dhe partive të tjera maqedonase”, thonë nga ASH-Sela.