Pas largimit të Arben Taravarit nga koalicioni “VLEN”, një reagim i fuqishëm ka ardhur nga Izet Mexhiti, një nga figurat kyçe të këtij formacioni. Në një mesazh emocional, Mexhiti shprehet se ndyshimi është i pashmangshëm, pavarësisht pengesave dhe rezistencës nga brenda apo jashtë politikës.
“Ndryshimi është i vështirë në fillim, i ngatërruar në mes, dhe i jashtëzakonshëm në fund. Por askush s’e ndal dot. As oportunistët, as demagogët, as politikanët e varur, as oligarkët”, – deklaroi Mexhiti.
Ai e përshkroi ndryshimin si një thirrje të popullit që nuk mund të injorohet, dhe që bashkon qytetarin e ndershëm, aktivistin e drejtë dhe militantin e sinqertë. Me këtë reagim, Mexhiti duket i vendosur për të vazhduar misionin politik, pavarësisht lëkundjeve të fundit brenda lëvizjes.
“Fryma e ndryshimit bashkon. Sepse ndryshimi VLEN”, përfundoi ai, duke lënë të kuptohet se projekti politik nuk do të ndalet me largimin e individëve, sado të rëndësishëm të kenë qenë ata.