Kryetarja e Qytetit të Shkupit, Danella Arsovska, sot ka paraqitur kallëzim penal në Prokurorinë për Ndjekjen e Krimit të Organizuar dhe Korrupsionit kundër kryetarit të Komunës së Çairit, Visar Ganiu, dhe disa punonjësve të tjerë të komunës, duke deklaruar se komuna dyshohet se ka përdorur një regjistër të falsifikuar në të cilin janë regjistruar kërkesat për legalizimin e ndërtesave të paligjshme, raporton Slloboden Peçat, transmeton Portalb.mk.
Sipas kallëzimit penal, qytetarët që në kohë të duhur kishin paraqitur kërkesa për të legalizuar ballkone apo pjesë të shtëpive të trashëguara ishin refuzuar nga komuna brenda afatit ligjor. Më pas, duke shfrytëzuar numrin e kërkesës së tyre të refuzuar në një regjistër të dyshuar të falsifikuar, janë legalizuar ndërtime pa leje dhe objekte shumëkatëshe në emër të personave të tjerë, të cilët kishin ndërtuar objektet rreth 10 vjet pas hyrjes në fuqi të Ligjit për legalizimin e ndërtimeve pa leje, ndërsa në kohën e paraqitjes së kërkesës ishin të mitur.
Në kallëzimin penal thuhet se qytetarët, ballkonet dhe pjesët e shtëpive të të cilëve u refuzuan për legalizim, sollën raporte gjeodezike në përpjekje për t’i legalizuar ato.
Në kallëzimin penal ka 15 shembuj të tillë, por Arsovska po i kërkon Prokurorisë Publike për Ndjekjen e Krimit dhe Korrupsionit të ofrojë provë për pretendimet e saj që nuk mund të falsifikohet dhe që duhet të përdoret si pikë referimi – regjistri i kërkesave të paraqitura për përcaktimin e statusit ligjor të objekteve të paligjshme, i cili mbahet nga Ministria e Transportit.
Siç tha Arsovska, kur regjistri që mban Komuna e Çairit krahasohet me atë të Ministrisë së Transportit, do të vërtetohet se regjistri në Komunën e Çairit është i falsifikuar, të dhënat në të janë ndryshuar dhe janë shtuar numra shtesë të regjistrit.
“I bëj thirrje Prokurorisë Publike të Ministrisë së Transportit që urgjentisht të na e sigurojë regjistein arkivor nga Komuna e Çairit si dhe regjistrin nga Ministria e Transportit, i cili përmban të dhënat që dëshmojnë pa mëdyshje se regjistri arkivor nga Komuna e Çairit nuk korrespondon me regjistrin e Ministrisë së Transportit dhe Lidhjeve sepse është i falsifikuar”, tha Arsovska.
Ajo thotë se kjo u bë e mundur nga kryetari i komunës së Çairit Visar Ganiu dhe punonjës të tjerë në komunë për të mundësuar legalizimin e ndërtesave me dokumente të falsifikuara.
Kryetari i Komunës së Çairit, Visar Ganiu, nuk iu përgjigj thirrjeve dhe mesazheve nga Slloboden Peçat.
Arsovska së fundmi ka qenë në “gjueti të ndërtimeve pa leje” në Komunën e Çairit, duke i dokumentuar ato dhe duke i publikuar në profilin e saj në Facebook përmes video-mesazheve. Ajo madje ka kërkuar ndihmë edhe nga faktori ndërkombëtar.
Danella Arsovska ka dorëzuar në prokurori dëshmi dhe dokumente lidhur me ndërtimet pa leje në Çair. Arsovska pretendon se në komunën e Çairit ka 150 ndërtime pa leje. Ajo akuzon ish kryetarin Izet Mexhiti dhe kryetarin aktual Visar Ganiu për ndërtimet pa leje në Çair. nje titull per lajm