Arsim Zekolli ka reaguar ashpër pas deklaratave të Izet Mexhitit, i cili tha se “mes meje dhe Kasamit do të përzgjidhet lideri i ardhshëm i VLEN”. Sipas Zekollit, kjo është një zgjedhje e rrafshit lokal, e krahasuar me një “përkthim banal nga maqedonishtja: une ty vojvod, ti mua serdar”.
Zekolli thekson se Mexhiti dhe Kasami “po përzgjedhin Kryetar, jo Lider”, pasi sipas tij lidershipi ka një peshë krejt tjetër politike. Ai kujtoi edhe ironikisht periudhën e ish-Jugosllavisë, duke thënë se edhe atëherë “Sejdo Bajramoviq përzgjidhej formalisht President, ndërsa lidershipi i vërtetë ishte aura mbi Kaqusha Jasharin”.
Analisti ka kritikuar hapur edhe partitë që përbëjnë VLEN-in, duke thënë se nuk mjafton të shpallësh veten lider në Çair apo Tetovë për të qenë udhëheqës kombëtar. Sipas tij, vetëm numrat realë në terren – nga Struga në Kumanovë – e legjitimojnë Ali Ahmetin si lider shqiptar në Maqedoninë e Veriut.
Zekolli shton se Mexhiti, Kasami apo të tjerët brenda koalicionit duhet “të tregojnë muskuj para Mickoskit, jo vetëm ndaj Alisë”, nëse duan të quhen liderë e jo “lokalistë dhe princër regjentë të deleguar”.
Ai e mbyll reagimin me një thumb të fortë:
“Në Romën Antike edhe gomarët emëroheshin senatorë.”