Presidenti i Federatës Shqiptare të Futbollit (FSHF), Armand Duka, në një intervistë për televizionin “Euronews Albania”, ndër të tjera, foli edhe për Edon Zhegrovën dhe Kombëtaren e Kosovës.
Kreu i futbollit shqiptar theksoi se Zhegrova është një lojtar që do të dëshironte ta shihte në Kombëtaren kuqezi, ndërsa shtoi për përfaqësuesen e Kosovës se i pëlqen ecuria e ekipit të drejtuar nga trajneri Franco Foda deri më tani.
Përsa i përketë Zhegrovës, një yll te Lille në Ligue 1 franceze dhe përfaqësuesen e Kosovës, Duka u shpreh: “Rregullorja nuk lejon që të marrësh futbollistë që janë aktivizuar me ekipin A, por me dëshirë do e merrja Zhegrovën (qesh)”.
25-vjeçari numëron 34 ndeshje me Kosovën, çfarë e përjashton kategorikisht mundësinë që ai të përfaqësojë Shqipërinë, sipas rregullave në fuqi të UEFA-s dhe FIFA-s.
Ndërsa, duke folur për ecurinë aktuale të “Dardanëve”, Duka tha: “Kosova ka një skuadër shumë të mirë. Me përbërje shumë të mirë, futbollistë me shumë kualitet, të nivelit evropian dhe që mund të bëjë shumë mirë në çdo ndeshje”.
“Pavarësisht se patën një hap fals ndaj Rumanisë në ndeshjen e parë, në ndeshjet e tjera ka qenë bindëse dhe uroj që të vazhdojnë kështu deri në fund”.
“Disi e vështirë duket që të jetë e para në grup, por edhe si e dyta e grupit mund të luajë në play-off, por jam shumë i sigurt që do ta kalojnë dhe do të ngjiten në Ligën B në Nations League”.
“Do të jenë një ekip pretendent për Kupën e Botës 2026. Nëse e ka ndryshuar Foda apo e ka ndryshuar koha, këtë nuk di ta them, sepse nuk e njoh nga afër punën e trajnerit. Por di që është një trajner me eksperiencë dhe me shumë rezultate pozitive”, përfundoi kreu i FSHF-së, Duka.