Ish-ambasadori dhe njohësi i rrethanave politike, Avni Arifi, duke e komentuar 4 vjetorin e njohjes nga Izraeli, tha se që nga ajo kohë nuk ka pasur njohje të tjera për shtetin e Kosovës.
I ftuar në RTK, Arifi theksoi se nuk është punuar në këtë drejtim.
“Nuk ka pasur se si të vijnë njohjet, kur MPJD nuk është punuar për njohje të tjera. Kosova nuk ka punuar për njohje qe 4 vite dhe ai proces ka mbetur aty ku ka qenë”, tha Arifi duke shtuar se çështja e njohjeve është totalisht e harruar.
Ai tha se në këtë situatë që jemi është e papranueshme degradimi i marrëdhënieve me aleatët tanë.
“Pra problemi kryesor në Kosovë është degradimi i marrëdhënieve me aleatët. Ne duhet të jemi të sinqertë me vetveten dhe të mos e mashtrojmë opinionin. Nga 117 njohje diku 90 sosh vijnë nga Shtetet e Bashkuara të Amerikës, partneriteti me ta e iniciativat e përbashkëta”, tha Arifi duke shtuar se sipas ambasadës së SHBA-së ka humbur ai entuziazmi i diplomatëve amerikan kudo në botë që të ndihmohet Kosova.
Sipas Arifit Ministria e Punëve të Jashtme në vend se të merrej me çështjet e njohjeve, ajo është marrë me riorganizimin e brendshëm të administratës.
“Ndonëse në ministri e quajnë reformë ka pasur një zhvendosje totale ku ministria është marrë me punë të brendshme, me punë të kuadrove e me largimin e njerëzve, qoftë nga misionet diplomatike qoftë nga postet brenda për brenda ministrisë, zhvendosje të drejtorëve etj, duke e bërë një klimë të keqe në këtë ministri”, tha ai.