Arbër Ademi nga Fronti Europian bëri të ditur se tubimin përmbyllës e kanë zhvendosur për një ditë më parë, pra më 5 maj dhe jo siç ishte paraparë.
Ademi tha se gjithmonë kanë bërë thirrje që të evitohen problemet mes shqiptareve dhe kjo ishte arsyeja që vendosen edhe të ndryshojnë datën e tubimit që siç tha, pavarësisht se ishin të parët që vendosën dhe kanë marrë konfirmimin edhe nga Sektori për punë të Brendshme në Tetovë.
Tutje Ademi tha se ky vendim është për mos u futur në skenarët e Rusisë dhe Putinit dhe shtoi se Billall Kasami është vegël e tyre.
“Opozita shqiptare me ngulm tenton që të krijojë tensione, kërkon që të krijojë probleme ndër shqiptarët. Ne si parti më e madhe politike në vend që kemi bërë gjithmonë thirrje për maturi e për t’i evituar të gjitha problemet e mundshme ndër shqiptarët, megjithëse me kohë, para tyre, 10 ditë para tyre kemi marrë konfirmimin dhe lejen nga organet e policisë, Sektori për Punë të Brendshme në Tetovë, ne kemi vendosur që tubimin përmbyllës ta zhvendosim një ditë përpara. Jo më 6 maj por më 5 maj në orën 20:00 më sheshin “Liria””, tha Ademi.