Arben Ratkoceri ka sjellë një rikujtim historik të ngjarjeve që i paraprinë Kongresit të Manastirit, duke theksuar se shumica e shqiptarëve të asaj kohe ishin kundër përdorimit të alfabetit latin. Sipas tij, në vitin 1908 u organizuan peticione dhe protesta masive, sidomos në Shkup – atëherë kryeqendra e shqiptarëve – nën drejtimin e deputetit dhe imam Seid ef. Hoxha, të cilët kërkonin mbajtjen e alfabetit arab.
Ratkoceri kujton se fillimisht, kryetar i Kongresit ishte emëruar Rexhep efendi Voka nga Tetova dhe jo Mit’hat bej Frashëri, siç njihet gjerësisht sot. Por një ditë para hapjes së Kongresit të Manastirit, më 13 nëntor 1908, Voka dha dorëheqje pasi u “korruptua”, siç shkruan autori, nga autoritetet osmane që e emëruan myfti të Vilajetit të Manastirit – pozita më e lartë fetare në atë kohë.
Me këtë veprim, sipas Ratkocerit, Voka tentoi të minonte punën e Kongresit dhe madje shpërndau një abetare të shqipes me shkronja arabe, si dhe dy broshura të tjera të përgatitura me mbështetjen e pushtetit osman.
Në përfundim, Arben Ratkoceri thekson se shqiptarët, nga formimi i kombit e deri më sot, gjithmonë kanë ecur përpara vetëm atëherë kur elitat e tyre kanë vepruar në kundërshtim me shumicën absolute.