Pas publikimit të lajmit nga portali ynë, ku zbuluam se në Ministrinë e Bujqësisë nuk është avancuar asnjë shqiptar në pozita më të larta, zëvendësministri Albrim Hoxha ka reaguar publikisht.
Por në vend që të japë përgjigje konkrete për situatën, Hoxha e pranon vetë: “Asnjë shqiptar nuk është avancuar.” Dhe në vend që të marrë përgjegjësi, ia lë fajin të tjerëve – pikërisht atyre me të cilët sot ndan të njëjtin koalicion qeverisës.
“Jam vetëm tre javë në detyrë. Procedurat janë nisur shumë më herët nga të tjerë,” – shkruan Hoxha, duke ia drejtuar gishtin bashkëpartiakëve të djeshëm nga VLEN, që sot, në fakt, janë bashkë me të në të njëjtën qeveri.
Madje, nuk kursen as ironinë: thotë se ish-zëvendësministri është kujdesur vetëm “të emërojë shoferin e tij personal,” ndërsa punonjësit shqiptarë kanë mbetur me tituj të ulët si “pomlad sorabotnik”, për më shumë se 10-15 vite.
Në reagimin e tij, Hoxha tenton të japë një mesazh shprese, duke thënë se së shpejti në ministri do të punësohen 20 shqiptarë të rinj dhe se procedurat për avancime ligjore janë në përgatitje. Por asnjë shifër nuk mohohet nga ajo që u publikua: sot, në këtë ministri asnjë shqiptar nuk është avancuar – dhe këtë ai vetë e konfirmon.
Ironia e gjithë kësaj? Albrim Hoxha është emëruar pikërisht nga koalicioni VLEN. Dhe sot, nga i njëjti koalicion, po kërkon të distancohet – edhe pse është pjesë aktive e tij.
