Edhe pse ka luajtur shumë role të ndryshme, duke përfshirë 19 mbretër, aktori Xhevat Limani, rolin e heroit Gjergj Kastriot – Skënderbeu e konsideron si një sfidë unike për karrierën e tij.
Ai beson se roli i Skënderbeut është më shumë se një sfidë aktoriale, është një detyrë që e kryen me një përkushtim të veçantë.
Limani në emisionin Rreth e Rrotull ka renditur disa nga karakteristikat unike të Skënderbeut që e bëjnë atë një figurë të jashtëzakonshme në historinë shqiptare, duke e quajtur atë edhe profet të shqiptarëve.
“Janë gati mbi dy mijë e ca vepra në universin e civilizimit botëror që kanë shkruar për profetin e shqiptarëve Gjergji Kastrioti – Skënderbeu, për një arsye konkrete dhe ky është motivi kryesor që ta luaja mbretin e fundit. Unë kam luajtur 19 mbretër në skenë, dhe natyrisht që aktori i vë një kurorë karrierës së tij , dhe atë kurorë desha të jetë me kryembretin, mbretin e shqiptarëve Gjergj Kastriotin – Skënderbeut”, është shprehur ai.
Në intervistën e tij, Limani gjithashtu vlerësoi aftësitë e Skënderbeut në fushën e diplomacisë, në luftën dhe në krijimin e një morali të lartë në ushtrinë e tij.
Ai e cilësoi Skënderbeun si një udhëheqës të jashtëzakonshëm për shqiptarët, duke shfaqur cilësi të rralla të moralit dhe të vendosmërisë.
“Unë desha të sjell porositë e ngrohta, dhe veprimet e tij ishte i zoti i shpatës dhe krahut, ishte i aftë në mendjen e tij, fliste me diplomatë e huaj në tetë gjuhë që sot aktualisht kur pyesim presidentët shqiptarë a ka ndonjë të tillë që flet tetë gjuhë. Theu një kod u martua me një mbretëreshë shqiptare nuk veproi si mbretërit të tjerë të marrin mbretëreshë të huaj, me mision të veçantë që të bashkojë jugun me veriun, principatën e fuqishme të Arianitës me Principatën e Kastriotëve. Krijoi ushtrinë, i fali të gjithë kundërshtarët që ishin edhe gjaku i tij dhe nuk e vrau asnjë në shenjë hakmarrjeje. Dha shembull konkret që ushtarët gjatë luftës të mos vrasin fëmijë, gra pleq dhe njerëz të pambrojtur dhe ky është kodi moral që e mori edhe Ushtria Çlirimtare e Kosovës”, ka thënë ai.
Limani ka bërë thirrje që të mos “baltoset” figura e Skënderbeut në kujtesën historike dhe artistike të shqiptarëve, duke mos e lënë atë vetëm si një personazh nëpër muze, por duke e sjellë atë në jetë nëpërmjet artit dhe interpretimit të tij në skenë.
“Nuk mund të jetë Gjergj Kastrioti një personazh që po e lëmë atje në muze apo siç e kemi mësuar gabimisht nëpër shkolla që Skënderbeu me kalin e tij fluturon nëpër mal. Dhe shumë e gjëra tjera të pabesueshme, ai ka qenë njeri prej mishi dhe prej gjaku, njeri me këmbë në tokë dhe të gjitha këto teori që po bëhen anti-kryeheronjëve tanë kombëtare janë të këqij dhe ziliqar që duan të rrëmbejnë të bukurën dhe të mrekullueshmen”, ka deklaruar Limani në emisionin Rreth e Rrotull.