Këshilltar i Albin Kurtit – VV-së, Bekim Qoku tashmë pjesë e koalicionit opozitar – VLEN në Maqedoninë e Veriut, ka reaguar ndaj deklaratës së Ziadin Selës së ASh-së, të dhënë në ClickPlus në TV21.
Qoku është ndalur te pjesa ku Sela futi në lojë dy opsione të ASh-së, t’i bashkohet ndonjërit bllok politik aktual ose të mos dalë fare në zgjedhje, pasi sipas Selës, tema e listave të përbashkëta dhe shkuarja në zgjedhje vetë, janë tema të ezauruarua.
Në këtë linjë, Qoku i bëri thirrje Selës që t’i bashkohet VLEN-it, madje ai edhe ia hap vendin krah tij, pasi siç thotë, ai nuk i takon Frontit Europian – “fotografisë së shëmtuar”.
“Miku im i vjetër, Ziadin Sela, e dëgjova sot deklaratën tënde, se je i detyruar të zgjidhësh mes dy blloqeve shqiptare.
Reagimi i Qokut në formë të integruar dhe pa ndërhyrje:
“I dashur Ziadin, nëse je aty ku ke qenë, me sinqeritet të plotë të ftoj të vish tek VLEN. Ti nuk i takoni asaj fotografie të turpshme që u shpërnda dje. Eja tek VLEN, do ta gjesh respektin e merituar dhe nderin e duhur. E them këtë ngaqë dua të të shoh si pjesë të fitores së madhe. Aq sa njihemi, mund të them se jam thellësisht i bindur që rruga e drejtë është ajo me ne. Unë e di se ka argumente për ta kritikuar këtë koalicion, por nuk mund të gjej asnjë që e përligj “Frontin” e Ali Ahmetit, Artan Grubit dhe Musa Xhaferit. Ti je mbrujtur nga lënda opozitare. Vendi yt është në krahun tim, aq sa vendi im në krahun tënd.
Të fala të sinqerta nga miku yt i vjetër, nga Bekimi i Vetëvendosjes, dhe nga VLEN!”