Bananet pritet të shtrenjtohen pasi ngrohja globale do ta prekë frutën e famshme, ka thënë një nga ekspertët më të njohur të industrisë.
Pascal Liu, ekonomist në Forumin Botëror të Bananes, ka thënë se ndikimet e klimës janë “kërcënim i jashtëzakonshëm” për zinxhirin furnizues.
Banania konsiderohet fruta më e eksportuar në botë.
Bananet janë të ndjeshme ndaj ngritjes së temperaturave dhe kjo mund të bëjë që ajo të zhduket në disa lokacione. Kërcënimi më i madh aktual konsiderohet se rritja e temperaturës ndihmon në shpërndarjen e sëmundjeve. Sapo një plantacion infektohet, ai shkatërron të gjitha trungjet dhe ekspertët thonë se është vështirë të hiqet infeksioni.
Mbretëria e Bashkuar javën e kaluar u përball me mungesë të bananes, për shkak të problemeve me transport si rrjedhojë e stuhisë në dete, kanë bërë të ditur ekspertët. Por përderisa zinxhiri i shpërndarjes mund të përballojë ngjarje të tilla të motit në afate të shkurtra, ekspertët janë të shqetësuar për shtimin e kërcënimeve nga temperaturat e larta dhe shpërndarjen e sëmundjeve si pasojë e tyre.
Përpos fenomeneve natyrore, ky treg po përballet me presion edhe nga shtrenjtimi i plehrave, energjisë, transportit dhe vështirësive në gjetjen e punëtorëve.
“Do të ketë ngritje çmimesh, padyshim”, ka thënë Liu. “Nëse s’do të ketë rritje të konsiderueshme të ofertës, unë parashikoj se çmimet e bananes do të mbesin relativisht të larta në vitet e ardhshme”.
Forumi do të mblidhet sot (e martë, 12 mars) në Romë për të diskutuar për tejkalimin e sfidave.