Ilir Demiri, deputeti i Aleancës për Shqiptarët që gjatë fundjavës njoftoi se do të veprojë si i pavarur në Kuvend, ka sqaruar për TV24 se nisma e tij synon hapjen e një procesi të ri politik që do të çojë drejt ribashkimit të të gjitha krahëve të partisë – atij të Ziadin Selës, Arben Taravarit dhe Arben Fetait.
Demiri theksoi se qëllimi i tij është “vetëmisht fisnik” dhe u bëri thirrje të gjithë deputetëve të ASh-së të bashkohen në një grup të përbashkët parlamentar, i cili më pas do të organizojë një Kongres për të zgjidhur problemet e brendshme.
“Duhet të ndalojmë gjyqet ndaj njëri-tjetrit dhe të konsolidojmë partinë. Qytetarët na dërguan një mesazh shumë serioz në këto zgjedhje. Është koha të reflektojmë,” deklaroi ai.
Demiri është funksionari i dytë nga krahu i Selës që ndërmerr një hap të tillë pas zgjedhjeve. Më herët, nga Aleanca për Shqiptarët u tërhoq edhe ish-ministri i drejtësisë, Krenar Lloga, duke shtuar lëvizjet e brendshme që po e tronditin partinë.