Ish-kryetari i Gjykatës Kushtetuese, Enver Hasani, ka kritikuar ashpër presidenten e Kosovës, Vjosa Osmani, duke e akuzuar për shkelje të rëndë të Kushtetutës në lidhje me propozimin për thirrjen e seancës së Kuvendit për shqyrtimin e buxhetit. Ai e cilësoi këtë veprim si “skandalin më të madh” të presidencës së saj. Sipas Hasanit, presidentja po i referohet në mënyrë të gabuar aktgjykimit të vitit 2020 për të justifikuar ndërhyrjen, duke e përdorur atë si instrument politik dhe jo si bazë juridike. “Skandali më i madh është militantizmi i Vjosës, që thotë se aktgjykimi i 2020 ia lejon këtë. Kjo është abuzim me qytetarët. Nuk ka logjikë”, deklaroi ai. Hasani theksoi se Kushtetuta e Kosovës është e qartë sa i përket procedurave që duhet ndjekur në rast të dështimit të përpjekjeve për formimin e Qeverisë. Ai sqaroi se presidentja nuk ka hapësirë diskrecioni për të shmangur organizimin e zgjedhjeve kur dështimi ndodh dy herë brenda afatit kushtetues. “Kushtetuta thotë se në këto raste vendi shkon në zgjedhje dhe ajo duhet ta dekretojë këtë. Nuk ka tjetër opsion”, u shpreh Hasani, duke shtuar se neni 95 i Kushtetutës përcakton qartë se zgjedhjet duhet të mbahen brenda 40 ditëve pas dështimit të dytë. Ai kujtoi gjithashtu se aktgjykimi i vitit 2020 ka të bëjë me rastin kur dështon mandatari i parë, jo i dyti, duke e vënë kështu në pikëpyetje referimin që, sipas tij, po i bën presidentja.
Shpërndaje