Kreu i PDK-së, Bedri Hamza, ka konfirmuar kthimin e Ramiz Lladrovcit në parti, duke e cilësuar si një rikthim të natyrshëm dhe të padiskutueshëm. Ky zhvillim, sipas burimeve, është arritur falë ndërmjetësimit të kryetarit të BDI-së, Ali Ahmeti, i cili ka luajtur rol kyç në afrimin e palëve dhe rikthimin e komunikimit.
Në takimin e zhvilluar, Hamza e përshkroi Lladrovcin si figurë të pandashme të Partisë Demokratike të Kosovës. Ai theksoi se atmosfera e këtij takimi u krijua pikërisht përmes ndërmjetësimit të Ali Ahmetit, gjë të cilën e nënvizoi në deklaratën e tij:
“Takim me mikun tim, zemërhapur…” — një referencë që Hamza e bëri pikërisht për Ali Ahmetin, duke vlerësuar rolin e tij në rikthimin e bashkëpunimit.
“Ritheksuam pa kushte se Ramiz Lladrovci ka qenë, është dhe mbetet PDK,” tha Hamza, duke theksuar edhe një herë peshën e Lladrovcit në strukturën e partisë.
Ai shtoi se Drenasi është komuna e shtatë ku vizioni i heronjve të luftës dhe paqes vazhdon të mbetet bastion i PDK-së dhe UÇK-së.
“Energjitë e bastionit të UÇK-së dhe PDK-së, në Drenasin e dëshmorëve dhe martirëve, me qeverisjen e shkëlqyer, do të jenë dëshmi e unitetit tonë për fitoren e 28 dhjetorit,” u shpreh Hamza.
Në fund, ai e përmbylli mesazhin me thirrjen mobilizuese:
“Të bashkuar, gjithmonë të fituar!”