Presidenti i Turqisë, Recep Tayyip Erdogan, ka zhvilluar sot një bisedë telefonike me presidentin rus Vladimir Putin, ku në qendër të diskutimeve ishte propozimi i Shteteve të Bashkuara për t’i dhënë fund luftës në Ukrainë.
Gjatë bisedës, Putin deklaroi se plani amerikan mund të shërbejë si bazë për një zgjidhje paqësore, duke theksuar se Rusia mbetet e përkushtuar ndaj një rruge politike dhe diplomatike për t’i dhënë fund konfliktit.
Nga ana tjetër, Erdogan i ka bërë të qartë homologut të tij rus se Turqia është e gatshme të luajë rol aktiv në procesin e paqes. Ai sugjeroi që Stambolli të jetë vendi pritës për negociatat, një rol që Turqia e ka ofruar edhe në fazat e mëparshme të luftës.
Plani amerikan me 28 pika, i bërë publik ditë më parë, si dhe kundërpropozimet e paraqitura nga vendet evropiane pas takimeve në Gjenevë me palën ukrainase dhe amerikane, kanë rikthyer në qendër të skenës ndërkombëtare mundësinë e rifillimit të negociatave për paqe.
Diskutimet e sotme mes Erdogan dhe Putin konsiderohen një sinjal i rëndësishëm se dialogu diplomatik mund të jetë drejt ringjalljes, në një moment kur lufta në Ukrainë ka hyrë në vitin e saj të katërt.