Ushtria izraelite ka vrarë një anëtar të lartë të Hezbollahut në një sulm ajror në jug të Bejrutit, duke shënuar goditjen më të rëndë të muajve të fundit kundër grupit shiit libanez, pavarësisht armëpushimit ende në fuqi. Viktima është identifikuar si Haitham Ali al-Tabtabai, një figurë veterane dhe shef i shtabit të Hezbollahut, i njohur për mbajtjen e detyrave të larta brenda organizatës.
Sipas Ministrisë së Shëndetësisë së Libanit, sulmi goditi një ndërtesë apartamentesh në lagjen e populluar Dahieh, duke lënë të paktën pesë të vdekur dhe 28 të plagosur. Forcat shpëtimtare vijuan operacionet për kërkim-shpëtim për orë të tëra mes rrënojave. Hezbollahu konfirmoi vdekjen e Tabtabait dhe akuzoi Izraelin për “kalimin e një vije të kuqe”. Ky është sulmi i parë ajror izraelit në Bejrutin jugor prej muajsh, në një kohë kur tensionet mes palëve janë rritur dukshëm.
Goditja ndodhi ndërsa Izraeli po intensifikon fushatën kundër objektivave që pretendon se janë të lidhura me Hezbollahun, pavarësisht armëpushimit të ndërmjetësuar nga SHBA-ja dhe Franca që hyri në fuqi në nëntor. Autoritetet izraelite thonë se Hezbollahu po përpiqet të rindërtojë kapacitetet e tij ushtarake, po kontrabandon armë në Liban dhe po zgjeron prodhimin e dronëve.
Kryeministri izraelit Benjamin Netanyahu reagoi pas sulmit duke deklaruar se Izraeli “nuk do të lejojë Hezbollahun të rindërtojë pushtetin e tij dhe të kthehet në kërcënim”. Ai shtoi se pret që qeveria libaneze të “përmbushë angazhimin e saj për çarmatosjen e Hezbollahut”. Sulmi rrezikon të ringjallë frikën e një përshkallëzimi më të gjerë në rajon, ndërsa armëpushimi mbetet gjithnjë e më i brishtë.