Legjislatura e nëntë është shpërndarë nga presidentja Vjosa Osmani, pasi për shtatë muaj nuk arriti të zgjedhë Qeverinë e re në dy tentime. Pas konsultimeve me partitë, Osmani caktoi 28 dhjetorin si datë për zgjedhjet e parakohshme, ndërkohë që partitë opozitare kërkonin 21 dhjetor.
Kështu, Kosova hyn në zgjedhjet e treta për këtë vit, pas zgjedhjeve parlamentare të 9 shkurtit dhe zgjedhjeve lokale të 12 tetorit. Për zgjedhjet parlamentare ishin parashikuar 8.7 milionë euro, ndërsa shpenzimi real ishte rreth 7.9 milionë euro. Zgjedhjet lokale kërkuan një buxhet prej 10.5 milionë eurosh.
Në zgjedhjet lokale, Lëvizja Vetëvendosje dhe Lidhja Demokratike e Kosovës kanë udhëhequr nga shtatë komuna secila. Partia Demokratike e Kosovës fitoi disa komuna si Prizren, Kaçanik dhe Vushtrri, Aleanca për Ardhmërinë e Kosovës triumfoi në 5 komuna, ndërsa Lista Serbe mbetet partia me më shumë komuna nën udhëheqje.
Në zgjedhjet parlamentare të 9 shkurtit, Vetëvendosje fitoi mbi 42% të votave, e ndjekur nga PDK me 20.95% dhe LDK me 18.27%. Koalicioni AAK-Nisma dhe Lista Serbe morën respektivisht 7.06% dhe 4.26% të votave.
Me këtë cikël zgjedhor, Kosova vendos një rekord të ri në garat elektorale, duke bërë që qytetarët të përballen me një maratonë politike të pazakontë brenda një viti.