Nxënësi nga Çairi dhuron 5 mijë euro për shkollën e tij “Imri Elezi”
Një gjest frymëzues nga një i ri në Çair po bën bujë në rrjetet sociale. Hunejs Kurtishi, nxënës nga lagjja Dizhon, ka dhuruar 5 mijë euro për shkollën ku ndjek mësimet, “Imri Elezi”, duke treguar se moshat e reja mund të japin shembuj të jashtëzakonshëm solidariteti dhe përgjegjësie shoqërore.
Paratë, siç njofton TV21, Hunejsi i ka grumbulluar nga aktiviteti i tij në YouTube (YT), ndërsa lajmin e ka bërë publik babai i tij, ilahisti i njohur Nusret Kurtishi.
Donacioni do të përdoret për blerjen e kamerave të sigurisë dhe sistemit të identifikimit me kartela për mësimdhënësit, duke përmirësuar kushtet dhe sigurinë në shkollë.
“Dëshira e tij është që të kontribuojë në shkollë dhe të jetë një shembull për të tjerët, duke synuar të motivojë dhe frymëzojë bashkëmoshatarët,” – ka shkruar Nusret Kurtishi në rrjete sociale.
Ky veprim i Hunejs Kurtishit është pritur me vlerësime të shumta nga mësimdhënës, bashkëmoshatarë dhe komuniteti i Çairit.