Edhe pse shpeshherë është raportuar se janë hasur automjete të qyteteve të tjera që sjellin qentë endacakë nga qytetet tjera, megjithatë deri më tani nuk ka asnjë raportim konkret në polici
Urim HASIPI
Tetovë, 23 tetor – Në mungesë të një qendre rajonale për trajtimin e qenve endacakë në Pollog, problemi sa vjen e rritet nga viti në vit. Edhe pse në rajonin e Tetovës rastet e kafshimit nga qentë endacakë janë ulur, megjithatë më problem gjendja mbetet në Gostivar. Sipas të dhënave që jep Sektori për Punë të Brendshme në Tetovë, në Gostivar brenda dhjetë muajve janë regjistruar 89 raste të kafshimit nga qentë endacakë, kurse në Tetovë 25 raste.
“Sa i përket problemit me qentë endacakë, në Sektorin për Punë të Brendshme në Tetovë brenda dhjetë muaj janë regjistruar 114 të kafshimeve nga ana e qenve endacakë, por edhe lëndimeve që kanë marrë qytetarët gjatë tentimeve për t`u shmangur nga sulmet. Në Tetovë, krahasuar me vitet e kaluara, jemi në gjendje më stabile, ku gjatë këtyre muajve kemi regjistruar vetëm 25 raste të kafshimit nga qentë endacakë, kurse gjendja më alarmante është në rajonin e Gostivarit, ku gjithsej janë regjistruar 89 raste. Edhe pse ne si polici, nuk jemi të involvuar drejtpërdrejt në këtë problematikë, megjithatë rastet i evidentojmë sepse qytetarëve ju nevojiten vërtetimet për procedurat e mëtutjeshme”, njofton Fatmir Rexhepi, zëdhënës i Sektorit për Punë të Brendshme në Tetovë.
Edhe pse shpeshherë është raportuar se janë hasur automjete të qyteteve të tjera që sjellin qentë endacakë nga qytetet tjera, megjithatë deri më tani nuk ka asnjë raportim konkret në polici. Nga Policia e Tetovës thonë se mosdenoncimi i automjetit dhe targave e bën më të vështirë identifikimin eventual të atyre që sjellin qentë në Tetovë nga qytetet tjera.
“Deri më tani, në Sektorin për Punë të Brendshme në Tetovë nuk është regjistruar asnjë rast ku do të raportohen targa automjeti apo vend në të cilin është vërejtur duke lëshuar ose duke shkarkuar qen endacakë dhe kjo e bën edhe më të rëndë situatën, shkaku se është problem për t`u identifikuar. Apeloj deri tek qytetarët, që nëse në raste të këtilla verifikohet një gjë e tillë, të raportojnë në numrin 192 apo 112 dhe kryesisht gjatë raportimit duhet të dihet vetura apo automjeti dhe targat e të njëjtit, sepse kjo do të ishte më e lehtë që të identifikohet për kënd bëhet fjalë”, tha zëdhënësi Rexhepi.
Ditë më parë, nga Komuna e Tetovës denoncuan se kishin kapur një qen endacak të sjellë nga Shkupi dhe i njëjti ishte identifikuar përmes çipit. Denoncimet e këtilla janë të shpeshta dhe jo vetëm nga autoritetet lokale të Tetovës, por edhe nga autoritetet e Komunës së Gostivarit. Denoncimet janë se këta qen sillen nga qytete tjera dhe lëshohen në komunat e Pollogut. Deri më tani, qendra për trajtimin e qenve endacakë ka pasur edhe në Tetovë edhe në Gostivar, por kjo dukuri vazhdon të jetë shqetësim serioz për banorët e këtij rajoni. (koha.mk)