Presidenti i Egjiptit, Abdel Fatah El-Sisi, të hënën ia dha homologut të tij amerikan, Donald Trump, nderin më të lartë të Egjiptit – Urdhrin e Nilit – për mbështetjen e marrëdhënieve strategjike mes dy vendeve, sipas një deklarate të Presidencës së Egjiptit.
Sisi tha se ky është “nderi më i lartë shtetëror” që ofrohet nga Egjipti dhe u jepet “krerëve të shteteve ose atyre që i bëjnë shërbim të madh njerëzimit”, raporton televizioni BBC.
Presidenti egjiptian e nisi fjalimin me fjalët “Bismilahi Rahmani Rahim”, që përdoret në fenë islame në fillim të ndonjë vepre dhe që në gjuhën shqipe do të thotë “në emër të Zotit, Mëshiruesit, Mëshirëbërësit”.
Sisi gjithashtu i përshëndeti të pranishmit me përshëndetjen “Selam Alejkum”.
Medalja e Urdhrit të Nilit përbëhet nga ari i pastër dhe shoqërohet me një zinxhir me motive në formë katrori, secila me lule prej ari, e zbukuruar me rubin.
Kjo medalje më parë u është dhuruar edhe disa krerëve të tjerë botërorë, përfshirë ish-presidentin amerikan, Jimmy Carter, për rolin e tij në ndërmjetësimin e traktatit të paqes mes Egjiptit dhe Izraelit në Uashington më 1979.
Urdhri i Nilit u është dhënë edhe Mbretëreshës Elizabetë II të Britanisë më 1975 dhe ish-liderit të Afrikës së Jugut, Nelson Mandela, në vitin 1990./Nacionale