Mesazhi që do ta dërgojnë qytetarët më 19 tetor nuk do të jetë vetëm votim në zgjedhjet lokale, por çdo qytetar që do të dalë të votojë, do të votojë që shteti të kthehet në rrugën evropiane.
Kështu u shpreh kandidati për kryetar të Komunës së Çairit, Bujar Osmani, në përgjigje të një pyetjeje të gazetarëve. Ai shtoi se si kryeministri Hristijan Mickoski, ashtu edhe subjektet e tjera politike tashmë janë të vetëdijshme se situata aktuale është e paqëndrueshme.
“Tashmë ekziston vetëdije te subjektet politike se situata në Qeveri është e paqëndrueshme. Ekziston konsensus te faktorët kryesorë politikë se zgjedhjet janë të pashmangshme. Ky është qëndrimi i të gjithëve, përveç partive politike që mbështeten te të tjerët për të mbijetuar,” deklaroi Osmani.
“Kemi një kthim prapa në pikat strategjike të shtetit. Mesazhi që do të dërgohet më 19 tetor, kur çdo qytetar do të dalë dhe, para së gjithash, do të votojë jo vetëm për komunën, por edhe për rikthimin e vendit në rrugën evropiane,” tha Osmani.
Ai shtoi se qytetarët kërkojnë ruajtjen e harmonisë multietnike dhe vazhdimin e agjendës reformuese të shtetit.
“Ky do të jetë një mesazh që do ta detyrojë shtetin menjëherë të shkojë në zgjedhje të parakohshme, në mënyrë që të fillojë një kapitull i ri në nivel shtetëror,” theksoi Osmani.