Ministri në detyrë i Punëve të Brendshme paralajmëron ndjekje pa kompromis të të gjithë agjentëve që veprojnë kundër Kosovës.
Policia e Kosovës ka arrestuar ish-drejtorin e Institutit për Afirmimin e Marrëdhënieve Ndëretnike në Kosovë, Fatmir Sheholli, nën dyshimet për kryerjen e veprës penale të spiunazhit. Ministri në detyrë i Punëve të Brendshme, Xhelal Sveçla, ka thënë se ky rast përbën “një nga aktet më të rënda” kundër rendit kushtetues dhe sigurisë në Kosovë.
“Koha e spiunëve të Serbisë në Kosovë ka përfunduar; kushdo që punon për Serbinë e kundër Kosovës do të ndiqet pa kompromis e pandalshëm. Republika duhet mbrojtur me përgjegjësinë më të lartë institucionale dhe morale”, ka shkruar Sveçla.
Sheholli ka deklaruar herë pas here nëpër televizionet e Kosovës se ka punuar për shërbimin sekret serb (UDB) gjatë periudhës para shpërthimit të luftës dhe ka shërbyer edhe në Shërbimin Informativ të Kosovës (SHIK) pas luftës së fundit në Kosovë.
Prokuroria Speciale ka njoftuar se Sheholli është arrestuar të enjten në Prishtinë me asistencë të Agjencisë së Kosovës pë Inteligjencë (AKI). Sheholli është ndaluar për 48 orë, sipas njoftimit, ndërsa njësitet e Policisë së Kosovës janë duke kryer bastisje në vendbanimin e të dyshuarit, duke synuar sigurimin të provave të tjera materiale.
“Prokuroria Speciale e Kosovës, në bashkëpunim dhe koordinim me Policinë e Kosovës, është duke ndërmarrë të gjitha veprimet e nevojshme hetimore, në përputhje me Kodin e Procedurës Penale dhe ligjet në fuqi, për të cilat do të njoftojë në kohë”.
Ndryshe, autoritetet kosovare të sigurisë kanë intensifikuar veprimet për identifikimin dhe ndëshkimin e veprimtarive që cenojnë sigurinë kombëtare. Në muajt e fundit, janë zhvilluar bastisje, sekuestrime dhe arrestime në kuadër të hetimeve për spiunazh.