Presidentja e Kosovës thekson se Turqia, si vend anëtar i NATO-s, po ndihmon Kosovën të ruajë paqen dhe sigurinë në rajon.
Presidentja e Kosovës, Vjosa Osmani, ka reaguar ndaj deklaratave të presidentit serb, Aleksandar Vuçiç, duke thënë se ai është duke e sulmuar paturpësisht Turqinë, i cili si vend anëtar i NATO-s, është duke i ndihmuar Kosovës që ta ruajë paqen në rajon.
“Jam krenare që kam punuar ngushtë me presidentin [turk, Recep Tayyip] Erdogan, i cili ka treguar gjithmonë kujdes të thellë për njerëzit e rajonit tonë, dhe ka bërë kontribut të jashtëzakonshëm për ruajtjen e paqes dhe sigurisë. Vuçiqi, në anën tjetër, duket se beson që mund ta kërcënojë një shtet të madh të NATO-s, sikurse është Turqia, njësoj sikurse i kërcënon shtetet fqinje”, ka shkruar Osmani në platformën X.
“Në vend që të punojë nga afër me vendet anëtare të NATO-s, ai e çon përpara bashkëpunimin me Rusinë, Kinën dhe Iranin në fushën e mbrojtjes”, ka shtuar tutje Osmani teksa është zotuar se Kosova do të vazhdojë t’i forcojë lidhjet me aleatë të NATO-s, duke i modernizuar kapacitetet në mbrojtje sipas standardeve të NATO-s.
“Vuçiçi duhet të tentojë ta bëjë të njëjtën, në vend që t’i sulmojë fqinjët. Por, duket se për mendësinë e tij hegjemoniste që ka mbetur në të kaluarën dhe është vazhdimisht e fiksuar në ngacmim të të tjerëve, një maturi e tillë duket përtej të arritshmes”.
Presidenti i Serbisë ka kritikuar Turqinë, duke theksuar se është i tmerruar nga sjellja e këtij vendi dhe ka konsideruar se presidenti turk e ka shkelur Kartën e Kombeve të Bashkuara dhe Rezolutën 1244 të Këshillit të Sigurimit të OKB-së, pas furnizimit të Forcës së Sigurisë së Kosovës me “mijëra” dronë kamikazë “Skydagger” RTF.
“Tash është plotësisht e qartë se Turqia nuk dëshiron stabilitet në Ballkanin Perëndimor dhe është duke ëndërruar sërish për ringjallje të Perandorisë Osmane. Serbia është shtet i vogël, por ne i kuptojmë synimet e tyre reale”, ka deklaruar Vuçiç.
Në dispozicion të Forcës së Sigurisë së Kosovës, përveç sisitemit turk “OMTAS” për shkatërrimin e tankeve dhe fluturakeve pa pilot “Bayraktar” për mbështetje ajrore, do të jenë edhe dronët kamikazë “Skydagger” që shërbejnë për misione goditëse.
Një kontingjent i madh i dronëve “Skydagger” mbërriti të mërkurën në Aeroportin Ndërkombëtar “Adem Jashari” në Prishtinë. Në mesin e kontejnerëve gjenden mijëra dronë kamikazë të tipit “Ready-to-Fly” të destinuar për goditjen e objektivave statike dhe lëvizëse, duke i mundësuar FSK-së rritjen e kapacitateve luftarake.