Një kontingjent i madh me mijëra dronë luftarakë kamikazë “Skydagger” ka mbërritur sot në Aeroportin Ndërkombëtar të Prishtinës “Adem Jashari”, duke shënuar një hap të rëndësishëm në modernizimin e Forcës së Sigurisë së Kosovës (FSK).
Burime zyrtare bëjnë të ditur se dhjetëra ushtarakë të FSK-së tashmë kanë përfunduar trajnimin për përdorimin e këtyre dronëve, të cilët janë prodhim i kompanisë së njohur turke “Baykar”, e njëjta që prodhon edhe dronët Bayraktar TB2.
Kontrata për blerjen e dronëve “Skydagger” është nënshkruar në dhjetor të vitit të kaluar, me afat dorëzimi në janar 2026, por furnizimi është realizuar tre muaj më herët se parashikimi.
Dronët “Skydagger” të tipit FPV RTF (Ready to Fly) janë fluturake pa pilot të pajisura me mjete shpërthyese, të destinuara për goditjen e objektivave lëvizëse dhe statike në fushëbetejë.
Sipas Ministrisë së Mbrojtjes, me këtë kontingjent të ri, FSK forcon ndjeshëm fuqinë e saj goditëse, krahas dronëve Bayraktar TB2 dhe fluturakeve Puma, duke ndërtuar një forcë moderne dhe të përgatitur sipas standardeve të luftës bashkëkohore.
Dronët u transportuan drejt bazave ushtarake me kamionët multifunksional Rheinmetall 8×8, prej të cilëve 10 janë blerë nga Kosova dhe 5 janë marrë si donacion gjatë vitit të kaluar.
