Ministria për Evropën dhe Punët e Jashtme e Shqipërisë ka reaguar ashpër ndaj deklaratës së Ministrisë së Jashtme të Serbisë të datës 4 tetor 2025, duke e cilësuar si një përpjekje të dëshpëruar për të rikthyer narrativat e vjetra të nacionalizmit dhe viktimizimit, që kanë sjellë vetëm tragjedi në Ballkan.
Në reagimin zyrtar, Shqipëria hedh poshtë me vendosmëri akuzat e pabaza të Serbisë, të cilat – sipas Tiranës zyrtare – synojnë të devijojnë nga përgjegjësitë historike të shtetit serb për krimet e luftës në Kosovë gjatë vitit 1999, përfshirë spastrimin etnik dhe dëbimin e mbi një milion shqiptarëve nga shtëpitë e tyre.
Ministria shqiptare shpreh keqardhje për faktin se Serbia ende mbështet retorikën e saj mbi Raportin e diskredituar të Dik Martit, i cili, siç theksohet në deklaratë, është një fabrikim pa prova, i përdorur ndër vite për të njollosur imazhin e Kosovës dhe Shqipërisë në skenën ndërkombëtare.
Por përtej përgjigjes ndaj akuzave konkrete, reagimi i Shqipërisë bart edhe një mesazh të qartë dhe simbolik që i adresohet konceptit gjithnjë e më shqetësues të ashtuquajturës “Botë Serbe”, një projekt politik dhe ideologjik që, sipas shumë analistëve dhe faktorëve ndërkombëtarë, përbën kërcënim real për stabilitetin e rajonit.
Në thelb, Shqipëria e sheh rikthimin e kësaj gjuhe si një përpjekje për të rishkruar historinë, për të ndërruar rolet mes agresorit dhe viktimës, dhe për të ngjallur tensione të reja në një kohë kur Ballkani ka nevojë për bashkëpunim e pajtim.
“Historia nuk rishkruhet me retorikë. Ajo mbahet mend me përgjegjësi”, theksohet në deklaratën e Ministrisë shqiptare, duke e cilësuar të papranueshme përmbysjen e të vërtetave historike.
Sipas Tiranës zyrtare, fryma e “Botës Serbe” është në kundërshtim të plotë me parimet e fqinjësisë së mirë, të bashkëjetesës paqësore dhe të së ardhmes evropiane të rajonit.
“Rajoni ynë ka nevojë për respekt të ndërsjellë dhe bashkëpunim të sinqertë, jo për rikthim tek gjuha e akuzave dhe mitomanisë,” thuhet në reagim.
Shqipëria, përmes këtij qëndrimi, riafirmon angazhimin e saj për një Ballkan të lirë nga nacionalizmat destabilizues, të bazuar në të drejtën ndërkombëtare, në drejtësi dhe në dinjitet për të gjitha komunitetet.