Shkup – Aktivisti dhe analisti Arben Ratkoceri ka reaguar ashpër ndaj deklaratave të Arben Taravarit, sipas të cilit shteti ka ndarë 250 milionë euro kredi shumë të favorshme nga fondet hungareze për 200 kompani, të gjitha maqedonase, ndërsa asnjë kompani shqiptare nuk ka përfituar nga ky program.
Ratkoceri e cilëson këtë situatë si “tmerruese”, duke theksuar mungesën e reagimit nga bizneset shqiptare për këtë padrejtësi. “Pse vallë kjo heshtje? Nga frika, apo nga mësimi që punët t’ua kryejnë gazetarët dhe politika, prej së cilës një pjesë e madhe e tyre kanë krijuar perandori biznesi përmes lidhjeve të shkurtra e të gjata?” – shkruan ai.
Ai kritikon gjithashtu edhe Oden Ekonomike të Bizneseve Shqiptare, e cila sipas tij ka heshtur plotësisht për këtë çështje. Ratkoceri ngre dyshime se ish-kryetari i saj ka pasur interesa personale, duke kërkuar përkrahjen e partisë VMRO për kandidaturën e tij në Strugë. “Diçka e ngjashme ka ndodhur edhe më herët, kur drejtues të kësaj Ode i hapën derën ish-kryeministrit Zaev për të kapur pozita qeveritare”, shton ai.
Sipas Ratkocerit, mungesa e reagimit dhe përfaqësimit real të bizneseve shqiptare në vend, vetëm sa e thellon pabarazinë ekonomike dhe krijon hapësira për përjashtim sistematik nga politikat shtetërore të mbështetjes financiare.