Artan Dika ka publikuar një denoncim ndaj pronarit të një kompanie ndërtimi, Mendi Qyra, i cili aktualisht kandidon për kryetar komune në Strugë.
Sipas Dikës, në vitin 2021 ai ka nënshkruar kontratë me kompaninë e Qyrës për blerjen e dy banesave në lagjen Taftalixhe të Shkupit, por ndërtimi i tyre nuk është realizuar kurrë. Ai thotë se ka qenë viktimë e një mashtrimi me dokumentacionin e banesave.
Dika thekson se Qyra i ka premtuar kompensim financiar për dëmin e shkaktuar, por deri më tani nuk ka paguar asgjë. “Premtimet e rrejshme dhe zvarritjet e pafundme më kanë detyruar t’ia bllokoj numrin e telefonit, derisa të shlyejë dëmin,” shkruan ai.
Duke qenë se Qyra është përfshirë në fushatën elektorale për postin e kryetarit të komunës së Strugës, Dika i bën thirrje gazetarëve ta pyesin publikisht:
“A kështu do t’i mbani premtimet e dhëna në fushatë, siç nuk e mbajtët premtimin me shkrim për kompensim?”
Ai e mbyll reagimin me thirrjen: “Z. Mendi Qyra, pagoi paratë!”, duke paralajmëruar se në ditët në vijim do të publikojë dokumentacionin e plotë të rastit.