Komisioni i letrave me vlerë i Republikës së Maqedonisë së Veriut, në mbledhjen e 65-të të kryesuar nga kryetarja e KKV-së, znj. Bujare Abazi, mori vendim me të cilin i jepet leje “ALTA BANKËS” AD Beograd, Republika e Serbisë, për dhënien e ofertës për marrjen e “Stopanska Banka” AD Bitola.
Oferta për marrje ka të bëjë me 371.538 aksione të zakonshme me të drejtë vote të emetuara nga “Stopanska Banka” AD Bitola, të cilat, së bashku me 19.439 aksione të zakonshme me të drejtë vote që tashmë i zotërojnë blerësit dhe personat me të cilët ata veprojnë së bashku, përfaqësojnë 100% të kapitalit themeltar të saj. Marrja do të kryhet me çmim prej 3.777 denarë për aksion.
Sipas blerësit, oferta do të konsiderohet e suksesshme nëse pranohet nga aksionarët që posedojnë së paku 273.795 aksione të zakonshme, që përfaqësojnë 70,03% të numrit të përgjithshëm të aksioneve të zakonshme me të drejtë vote të emetuara nga “Stopanska Banka” AD Bitola. Me këtë, blerësi dhe personat që veprojnë së bashku me të do të posedojnë 75% ose më shumë të aksioneve të zakonshme nga numri i përgjithshëm i aksioneve të zakonshme me të drejtë vote të emetuara nga “Stopanska Banka” AD Bitola.