Kryeministri izraelit Benjamin Netanyahu tha të enjten se nuk do të ketë shtet palestinez, gjatë një ceremonie të rëndësishme nënshkrimi për projektin e kolonizimit në Bregun Perëndimor.
“Ne do ta mbajmë premtimin tonë: nuk do të ketë shtet palestinez, ky vend na përket neve”, tha ai gjatë një eventi të organizuar në Maale Adoumim, një vendbanim izraelit i vendosur në lindje të Jerusalemit, dhe i transmetuar drejtpërdrejt nga shërbimet e tij. “Ne do ta ruajmë trashëgiminë tonë, tokën tonë dhe sigurinë tonë (…) Do ta dyfishojmë popullsinë e qytetit”, vazhdoi ai.
Izraeli miratoi muajin e kaluar një projekt kyç për të ndërtuar 3 mijë e 400 njësi banimi në Bregun Perëndimor, i denoncuar nga OKB-ja dhe disa udhëheqës të huaj sepse duhet ta ndajë këtë territor palestinez në dy pjesë, duke kompromentuar çdo vazhdimësi territoriale të një shteti të mundshëm palestinez.
Ministri izraelit i Financave, Bezalel Smotrich, një figurë e ekstremit të djathtë, kishte bërë thirrje për përshpejtimin e zbatimit të tij dhe aneksimin e Bregut Perëndimor, në përgjigje të njoftimeve nga disa vende për qëllimin e tyre për të njohur një shtet palestinez.
Vendet perëndimore si Franca, Australia dhe Kanadaja njoftuan qëllimin e tyre për të njohur një shtet palestinez në Asamblenë e Përgjithshme të OKB-së në fund të shtatorit.
Londra ka lënë të kuptohet se do të bëjë të njëjtën gjë nëse Izraeli nuk bën një sërë angazhimesh, duke përfshirë një armëpushim në Rripin e Gazës.
Sekretari i Përgjithshëm i OKB-së, Antonio Guterres, e dënoi ashpër këtë vendim, me Autoritetin Palestinez që denoncoi një fazë të re të “aneksimit gradual të Bregut Perëndimor”.
Kolonizimi i Bregut Perëndimor, në kufi me Jordaninë, ka vazhduar nën të gjitha qeveritë izraelite, të majta dhe të djathta, që nga viti 1967.
Ai është intensifikuar ndjeshëm nën ekzekutivin aktual, veçanërisht që nga fillimi i luftës në Gaza të shkaktuar më 7 tetor 2023 nga sulmi i paprecedentë i Hamasit ndaj Izraelit.