Tetovë – Aleanca për Shqiptarët ka reaguar ashpër pas, siç thotë ajo, humbjes së rejtingut dhe disfatës në zgjedhjet lokale të 19 tetorit nga koalicioni VLEN. Në një deklaratë publike, partia thekson se kjo humbje ka shkaktuar “tërbim dhe humbje kontrolli” brenda koalicionit rival.
Në fokus të reagimit është ministri Besar Durmishi, i cili sipas Aleancës po urdhëron administratën shtetërore dhe komunale që t’i shërbejnë fushatës partiake të VLEN-it. Për ta mbështetur këtë akuzë, është publikuar edhe një bisedë nga aplikacioni WhatsApp ku Durmishi kërkon që punonjësit e rinj të kabinetit dhe sektorëve të shpërndajnë tekste e foto me kryetarin, si dhe të postojnë statuse pozitive në rrjete sociale.
Në reagim, Aleanca i drejtohet nëpunësve:
“Shumë të respektuar nënpunës shtetërorë e komunalë, nuk keni nevojë të shqetësoheni e as të frikësoheni. Këto janë shqelmat e fundit dhe pa fuqi të një pushteti pa legjitimitet që në mungesë të sukseseve tenton t’ju frikësojë. Ju sigurojmë që askush, as tani e aq më pak nesër, nuk do të mund t’ju dëmtojë në asnjë mënyrë.”
Partia paralajmëron se ata që kanë tentuar ose do të tentojnë të keqpërdorin pushtetin për kërcënime “do të mbajnë përgjegjësi dhe do të japin llogari”.
Në fund, Aleanca për Shqiptarët u bën thirrje organeve të drejtësisë dhe sidomos Prokurorisë Publike që të hapë procedurë penale ndaj ministrit Besar Durmishi, duke e akuzuar për keqpërdorim të pozitës shtetërore. “Ky skandal duhet të jetë i pafalshëm nëse duam të kemi zgjedhje të lira, fer dhe demokratike”, përfundon reagimi.