Furkan Saliu kritikon Kasamin: “Po hyni në grackën e Mickoskit, pasojat do të jenë të dhimbshme”
Gazetari Furkan Saliu ka reaguar pas deklaratës së kryetarit të Besës, Bilall Kasami, lidhur me qëndrimet e djeshme të liderit të VMRO-DPMNE-së, Hristijan Mickoski.
Saliu thotë se kishte pritur që Kasami të kundërpërgjigjej ndaj Mickoskit, por në vend të kësaj ai “në njëfarë mënyre i kërkoi falje duke u arsyetuar se BDI po e fut në retorikën nacionaliste”.
“Jeni duke hyrë në grackën e Mickoskit për disa vota, ndërsa pasojat do të jenë afatgjata dhe të dhimbshme për kombin tonë”, ka shkruar Saliu.
Ai kujtoi një sërë qëndrimesh të liderit opozitar maqedonas, duke theksuar se:
• kur Mickoski kërkon shkarkimin e një drejtori shqiptar vetëm pse ka folur në gjuhën shqipe, kjo nuk konsiderohet nacionalizëm,
• fushata e tij antishqiptare në zgjedhjet parlamentare nuk është nacionalizëm,
• sulmet ndaj ligjit për përdorimin e gjuhëve, ndaj balancuesit dhe bandenterit nuk janë nacionalizëm,
• refuzimi për ndryshimet kushtetuese dhe pengimi i procesit evropian nuk është nacionalizëm.
“Z. Kasami, duhet fillimisht t’ia bëni të qartë vetes se çfarë jeni dhe çfarë doni të arrini në politikë. Me këtë konfuzion, po dukeni vetëm si kryetar i degës së VMRO-së në Tetovë”, përfundon Saliu.