Shkruan: Valon F. Bela
Alternativa dhe fundi i keqmenaxhimit në Çair
Është e qartë se edhe partia Alternativa po synon t’i japë fund keqmenaxhimit 20-vjeçar të Komunës së Çairit. Tentativa e Izet Mexhitit për të mobilizuar anëtarët e partisë, duke premtuar se në rast të fitores së tij do të pasojë Bekim Sali, është tregues i qartë i kësaj përpjekjeje. Por siç thotë fjala e urtë: “Kur dhelpra s’mund të kapë rrushin, thotë se është i tharë.”
Izeti mes kalkulimeve politike
Izet Mexhiti po mundohet, por duket qartë se “hesapi i çarshisë” nuk po i del me “hesapin e shtëpisë”. Në këtë ritëm, gjithçka tregon se në tetor ai as nuk do ta fitojë Komunën, e as nuk do të mbetet në Qeveri. Përpjekjet e tij, më shumë sesa strategji fituese, ngjasojnë me një luftë për mbijetesë politike.
Mickoski dhe paralelja me Gruevskin
Nga ana tjetër, Hristijan Mickoski nuk ka fuqi ta mbajë qeverinë me “vazalë humbës”, sado që të mundohet. Legjitimiteti shqiptar është pengesa kryesore, dhe këtë e ka mësuar edhe Nikola Gruevski kur tentoi eksperimentin me PDSH-në në vitin 2006. Historia tregon qartë: kush provon ta injorojë faktorin shqiptar, përfundon i përplasur përtokë.
Tetori – muaji i llogarive politike
Tetori është afër. Dhe me të, shumë figura politike do të përballen me verdiktin e qytetarëve. Disa prej tyre, që e menduan se bota sillet rreth tyre, do të zbresin nga skena dhe do të mbeten vetëm si një shënim i zbehtë në margjinat e historisë politike të vendit.