Në Kumanovë ka shpërthyer një skandal i ri politik pasi një grup anëtarësh, simpatizantësh dhe qytetarësh publikuan një peticion publik me të cilin kundërshtojnë mbështetjen e mundshme nga VMRO-DPMNE për kandidaturën e kryetarit aktual Maksim Dimitrievski në zgjedhjet lokale të vitit 2025.
Peticioni, i publikuar në faqen e Facebook-ut “Kumanovska Gorila”, kritikon ashpër punën e deritanishme të Dimitrievskit, të cilin e quajnë “partner i pavarur” i VMRO-së, por pa rezultate konkrete në interes të qytetarëve. Firmëtarët pretendojnë se gjatë katër viteve të fundit Kumanova ka mbetur “e lënë pas dore, me objekte jofunksionale, premtime boshe dhe infrastrukturë simbolike”.
Sipas tekstit, drejtësia sociale, planifikimi urban dhe zhvillimi ekonomik lokal nuk kanë lëvizur “as edhe një milimetër”, dhe asnjë projekt i rëndësishëm në bashkëpunim koalicioni nuk është realizuar. Në vend të kësaj, peticioni akuzon për “bllokada, populizëm dhe keqpërdorim të institucioneve për PR personal”.
Autorët pretendojnë se nga bashkëpunimi ekzistues mes VMRO-DPMNE-së dhe lëvizjes së Dimitrievskit – ZNAM – përfitojnë drejtpërdrejt vetëm disa individë, të përshkruar si “ekip negociues” që gëzon privilegje dhe përfitime. “Kjo nuk është parti, kjo është marrëveshje private e 3-4 pudëlëve politikë”, thuhet në tekst.
Firmëtarët kërkojnë që partia të dalë me kandidatin e saj për Kumanovën, i cili do të mbështetet nga anëtarësia, e jo nga “pazaret pas shpinës së aktivistëve”. Ata theksojnë se Kumanova “nuk është pronë e askujt” dhe se nuk pranojnë të jenë “monedhë politike në këmbim të funksioneve”.
Peticioni mbetet i hapur për të gjithë anëtarët, aktivistët dhe qytetarët që mendojnë se VMRO-DPMNE duhet të ketë “rrugë të denjë, të ndershme dhe të vetën” në Kumanovë.