Zërat e arsyes janë të rrallë në kohë kur urrejtja mbretëron në tribuna dhe heshtja në institucione. Një prej tyre vjen nga deputetja Doarsa R. Kica, e cila në një reagim të fuqishëm publik ka denoncuar gjuhën nxitëse ndaj shqiptarëve në një ndeshje basketbolli në Maqedoninë e Veriut – dhe më fort se kaq, heshtjen e turpshme të përfaqësuesve shqiptarë në pushtet.
“Ato që u dëgjuan në ndeshjen e basketbollit në Maqedoninë e Veriut s’ishin thjesht brohoritje, por zhurma primitive e një mendësie të kalbur. E megjithatë, më e neveritshme se kjo zhurmë është heshtja që e shoqëroi”, shkruan Kica.
Ajo ngre alarmin se heshtja nuk është më maturi, por bashkëfajësi, dhe se mungesa e reagimit ndaj thirrjeve antishqiptare është një akt i qartë dorëzimi kombëtar.
“Të jesh në qeveri dhe të mos reagosh kur fyhet identiteti yt, nuk është as politikë, as pragmatizëm – është dorëzim”, thekson ajo me tone të ashpra.
Goditje direkte për liderët shqiptarë në Maqedoni
Deklarata e saj është një shuplakë publike për të gjithë përfaqësuesit politikë shqiptarë në qeverinë e Maqedonisë së Veriut, të cilët – në vend që të ngrisin zërin për dinjitetin e popullit që përfaqësojnë – kanë zgjedhur heshtjen dhe nënshtrimin politik.
“Nuk e di kush prisni të jetë për ne shqiptarët kur nuk jemi për veten?”, përfundon Kica, duke e lënë pyetjen hapur për ata që pretendojnë të jenë zëri i shqiptarëve në Shkup.
Një moment i errët për politikën shqiptare në rajon
Rastet e tilla po bëhen të shpeshta në Maqedoninë e Veriut, por reagimet janë gjithnjë e më të zbehta. Kjo heshtje, që më parë quhej “maturi diplomatike”, tashmë po perceptohet si fajësi, frikë apo interes i ulët politik. Deklarata e Kicës është ndër të rrallat që guxon të thotë të vërtetën pa filtra.