Federata Shqiptare e Basketbollit (FSHB) ka reaguar zyrtarisht pas incidentit të rëndë të ndodhur gjatë ndeshjes kualifikuese për Kupën e Botës FIBA midis Maqedonisë së Veriut dhe Rumanisë, e zhvilluar në qytetin e Kumanovës. Gjatë ndeshjes, në tribuna u dëgjuan thirrje me përmbajtje raciste dhe antishqiptare, të cilat FSHB i ka denoncuar zyrtarisht pranë FIBA World.
Në një deklaratë publike, Federata thekson se ka ndërmarrë hapa konkretë institucionalë dhe ka kërkuar që FIBA të marrë masa të qarta dhe të menjëhershme ndaj akteve që cenojnë frymën e barazisë, respektit dhe fair-play-t që promovon sporti.
“Basketbolli nuk mund dhe nuk duhet të bëhet skenë e urrejtjes, racizmit dhe gjuhës përjashtuese. Sporti është dhe duhet të mbetet hapësirë bashkëpunimi, respekti dhe përfaqësimi dinjitoz,” – thuhet në deklaratën e FSHB.
Ky është një nga reagimet më të qarta institucionale shqiptare në nivel ndërkombëtar sportiv, duke kërkuar jo vetëm dënimin e thirrjeve raciste, por edhe mbrojtjen e standardeve etike dhe njerëzore të sportit në arenën ndërkombëtare.