Deputeti Bekim Qoku në qendër të akuzave për abuzim me fondet publike: 10.800 euro për udhëtime, ndërkohë që jeton në Shkup
Deputeti Bekim Qoku nga partia Vredi është vënë në qendër të një skandali publik, pas një denoncimi të bërë nga gazetari dhe aktivisti Umejr Muhamedi. Sipas publikimit të tij në rrjetet sociale, Qoku ka “shpenzuar” plot 10.800 euro nga buxheti i shtetit për harxhime rrugore, pavarësisht se, sipas denoncimit, jeton në Shkup, aty ku edhe ushtron funksionin e tij si deputet.
“Vjedhje klasike!” – shkruan Muhamedi, duke e quajtur rastin një shembull të pastër të abuzimit me fonde publike dhe të sjelljes klienteliste në kurriz të taksapaguesve. Ai publikon shifrën e plotë dhe e quan këtë sjellje “klasik lopovluk”, që do të thotë vjedhje e hapur në të dy gjuhët – shqip dhe maqedonisht.
Akuzat vënë në pikëpyetje mekanizmat e kontrollit dhe transparencës brenda Kuvendit të Maqedonisë së Veriut, sidomos për mbulimin e shpenzimeve të deputetëve që deklarojnë vendbanime të largëta për të përfituar dietat e udhëtimit, ndërkohë që jetojnë dhe veprojnë në Shkup.
Në mungesë të një reagimi zyrtar nga vetë deputeti Qoku apo nga partia VLEN, presioni publik është në rritje dhe kërkon sqarim urgjent, hetim të plotë dhe ndëshkim nëse faktohet abuzimi.
Ky rast ngre alarmin për nevojën e kontrollit të rreptë të pagesave të përfaqësuesve politikë, që shpesh e shohin buxhetin publik si pronë private, ndërsa qytetarët përballen me inflacion, papunësi dhe mungesë shërbimesh bazë.