Një grua në Kinë i dha një kuptim të ri shprehjes “hakmarrje me stil”, pasi u rikthye në dyqanin Louis Vuitton jo për të blerë, por për t’i bërë të ndiheshin… shumë keq.
Pas një përvoje të mëparshme ku ishte trajtuar me arrogancë nga stafi i dyqanit luksoz në qytetin Chongqing, gruaja, e identifikuar në rrjetin Xiaohongshu si “Xiaomayouren”, vendosi të mos e linte situatën të mbyllej me inat. Ajo u kthye në dyqan me 600,000 juanë (afërsisht 84,000 dollarë amerikanë) në cash, të gjitha në kartëmonedha të vogla.
Me një ton të qetë dhe buzëqeshje të ftohtë, ajo u shpreh se donte të blinte diçka – dhe kërkoi që paratë të numëroheshin. Dy punonjës të Louis Vuitton nisën të numëronin çdo kartëmonedhë një nga një, gjë që iu mori më shumë se dy orë. Asnjë aparat, asnjë numërim i shpejtë – vetëm duar të lodhura dhe tension në ajër.
Kur më në fund përfunduan, dhe menduan se do finalizonin shitjen, gruaja tha fjalinë që i dogji më shumë: “Në rregull, tani po iki. Nuk blej asgjë.” Mblodhi paratë me qetësi dhe doli nga dyqani, duke lënë pas vetëm heshtje dhe ndoshta edhe pak djersë të ftohta.
Sipas rrëfimit të saj në rrjetet sociale, ajo ishte revoltuar nga mënyra si ishte trajtuar më parë – pa respekt, pa vëmendje, madje pa as një gotë ujë. Me këtë veprim, ajo donte t’u kujtonte se respekti nuk blihet me markë, por jepet me sjellje.
Mesazhi? Në një botë ku paratë zakonisht hapin dyer, kjo grua i përdori për të mbyllur një derë – me klas, me durim dhe me një leksion që ata shitës nuk do ta harrojnë kurrë.