Shqipëria vazhdon me shifra rekorde të turistëve të huaj, që është konfirmim se po bëhet destinacion gjithnjë më tërheqës
Siç njoftoi kryeministri Edi Rama në Fejsbuk në gjysmën e parë të këtij viti në vend kanë qëndruar mbi 4,76 milionë të huaj.
Thekson se këto shifra janë tregues i një “rritjeje të stabilizuar të flukseve hyrëse dhe ekuilibrave të qëndrueshëm në menaxhimin e ofertës turistike”.
“Qëndrimi i 1,32 milionë vizitorëve të huaj vetëm gjatë qershorit janë fryt i një pune të suksesshme dhe përgjegjësi e shtuar për të gjithë në monitorimin e sezonit turistik veror”, vlerësoi kryeministri.
Konkretisht në qershor të vitit 2023, Shqipërinë e vizituan 1.007.033 turistë të huaj, ndërsa në qershor të vitit 2024 vendi u vizitua nga 1.244.967 të huaj. Në qershor të këtij viti Shqipërinë e vizituan 1.329.204 turistë të huaj ose shtatë për qind më shumë krahasuar me qershorin e vitit 2024.
Duke bërë krahasim me periudhën janar-qershor të vitit 2023 janë regjistruar 3.396.932 turistë të huaj, ndërsa në të njëjtën periudhë të vitit 2024 ka pasur 4.547.896.
Sipas Ramës, në periudhën janar-qershor të vitit 2025 rezultojnë 4.761.648, ose pesë për qind më shumë krahasuar me periudhën janar-qershor të vitit të kaluar.
“Bukuritë e Shqipërisë, që nga majat e Alpeve të thepisura, brigjet magjepsëse të rivierës shqiptare dhe të Adriatikut, sitet e trashëgimisë në UNESKO, monumentet e trashëgimisë kulturore dhe natyrore, parqet kombëtare, fshatrat e bukur turistikë nga veriu në jug, kulinaria dhe prodhimet tradicionale tërhoqën 4,76 milionë të huaj gjatë gjashtë muajve të këtij viti”, konstatoi Rama.