Sipas guvernatorit ushtarak të rajonit të Donetsk-ut, Vadym Filashkin, predha e rëndë u hodh në mënyrë që të shpërthente në qendrën e populluar të qytetit Dobropillja. Sipas gazetës “The Kyiv Independent”, objektivi ka qenë një qendër tregtare në zemër të qytetit. Krahas të vdekurve, ka dhjetëra të plagosur, ndërsa shumë dyqane dhe qindra apartamente janë dëmtuar.
Vija e frontit midis forcave ruse dhe ukrainase ndodhet vetëm rreth 15 kilometra larg kufirit të qytetit. Para pushtimit rus të Ukrainës në shkurt 2022, në Dobropillja jetonin pothuajse 30.000 njerëz.
Presidenti ukrainas Volodymyr Zelenskyj shkroi menjëherë pas sulmit me mega-bombë në platformën X për një “terrorizëm rus të tmerrshëm dhe idiot” dhe për “përpjekjen për të vrarë sa më shumë njerëz të jetë e mundur”.
Sulme të reja ajrore të rënda ndaj ndërtesave të banimit janë raportuar së fundmi edhe në qytetin Kostjantynivka në Ukrainën Lindore, ku qëndrojnë vetëm disa mijëra nga 67.000 banorët që kishte dikur.
Trupat ukrainase duket se po vazhdojnë taktikën e tyre, duke kryer sulme ajrore në territorin rus. Regjimi në Moskë raportoi sulme masive me dronë që nga mbrëmja.
Në rajonin e Belgorodit, pranë kufirit me Ukrainën, një grua dhe një burrë u vranë gjatë një sulmi me dron. Agjencia shtetërore e lajmeve TASS raporton gjithashtu për të plagosur. Edhe disa shtëpi janë dëmtuar.
Kryetari i Bashkisë së Moskës, Sergej Sobianin, raportoi gjithashtu se gjatë natës u rrëzuan tre dronë që po i afroheshin kryeqytetit. Sipas Ministrisë ruse të Mbrojtjes, mbrëmjen e kaluar u kapën gjithashtu dhjetëra dronë mbi rajonet Belgorod, Bryansk dhe Lipeck.
Ukraina, në mbrojtje kundër pushtimit rus, përdor gjithashtu dronë me rreze të gjatë veprimi për të goditur territorin e brendshëm rus. Megjithatë, dëmet dhe numri i viktimave nuk janë aspak të krahasueshme me shkatërrimet që ka shkaktuar Moska në vendin fqinj.