Një ngjarje tronditëse ka ndodhur mbrëmjen e së martës në qytetin Makhachkala të Dagestanit, ku luftëtari i njohur i arteve marciale të përziera (MMA), Timur Khizriev, është qëlluar me pesë plumba nga dy persona të maskuar, pranë banesës së tij.
Ngjarja ndodhi rreth orës 23:30, në rrugën Daniyalov, ndërsa Khizriev po largohej me automjetin e tij tip “Mercedes G-Class”.
Sulmuesit e panjohur iu afruan makinës dhe e qëlluan disa herë me një armë traumatike, një lloj arme jo-letalë që përdor municion gome apo plastik, por që në distancë të afërt mund të shkaktojë dëme serioze trupore.
Khizriev, ndonëse i goditur në shpatull, kraharor dhe dorë, arriti të mbijetojë dhe u transportua menjëherë në spital ku iu nënshtrua një ndërhyrjeje kirurgjikale.
Mjekët konfirmuan se ai ka pësuar një frakturë të rëndë në dorë, plagë të thella në trup dhe se ndodhet në gjendje të qëndrueshme jashtë rrezikut për jetën.
Reagimi i tij për të ikur nga vendi i ngjarjes, përkundër plagëve të shumta, është cilësuar si i jashtëzakonshëm dhe tregues i përgatitjes së tij të jashtëzakonshme fizike dhe psikologjike.
Sipas raportimeve zyrtare nga autoritetet ruse dhe burimeve mediatike lokale, është identifikuar një prej të dyshuarve për këtë sulm: bëhet fjalë për Marcel Aliyev, 29 vjeç, një person i njohur për konflikte të mëhershme me Khizriev.