Krenar Lloga ka lëshuar akuza të ashpra ndaj qeverisë aktuale, duke thënë se e vetmja gjë që ajo ka bërë lidhur me projektin e Korridorit 8 ka qenë përpjekja për ta vonuar, bllokuar dhe sabotuar. Sipas Llogës, meritat për avancimin e projektit i takojnë shumicës së mëparshme parlamentare dhe qeveritare, e cila arriti ta votojë projektin në Kuvend dhe ta koordinojë me të gjithë partnerët perëndimorë si SHBA, BE dhe NATO, duke e bërë atë të pakthyeshëm.
“Kur panë se nuk mund të pengonin më asgjë, filluan të recitonin poezitë e VMRO-së,” deklaroi Lloga, duke ironizuar ndryshimin e qëndrimit të qeverisë ndaj projektit.
Ai gjithashtu paralajmëroi zhvillime politike për muajin tetor, duke thënë: “Ashtu siç ndodhi me këtë projekt, edhe në tetor do ta shpëtojmë vLEN-in nga VMRO-ja dhe VMRO-në nga ‘Srpski Svet’,” duke lënë të kuptohet për një ofensivë të re politike kundër ndikimeve të huaja dhe bashkëpunimeve të dyshimta brenda politikës vendore.