Ish-ministri i Drejtësisë, Krenar Lloga, ka përkujtuar me respekt të thellë heroin Nuri Mazari në 20-vjetorin e ndarjes së tij nga jeta. Përmes një postimi publik, Lloga e ka cilësuar Mazarin si një figurë të pazëvendësueshme të përpjekjeve kombëtare të shqiptarëve.
“Nuri Mazari ishte i qetë në fjalë, por i palëkundur në parime; i thjeshtë në sjellje, por i madh në ideale. Ai dha gjithçka për të drejtat e shqiptarëve dhe për lirinë e popullit tonë,” shkruan Lloga.
Ai theksoi se në këtë përvjetor nuk kujtohet vetëm ndarja e tij nga jeta, por nderohen edhe gjurmët dhe vepra që vazhdojnë të frymëzojnë brezat e rinj.
Postimi u shoqërua me hashtagët #KomandantStruga, #UshtriaÇlirimtareKosoves dhe #UshtriaÇlirimtareKombetare, duke e rikujtuar rolin e rëndësishëm të Mazarin në luftën për liri dhe të drejta kombëtare.